مع شاعر القلم
آه بحبك *
لما شفتك واقفة فى أجمل طابور ...
وبرضاكى ...
ماسكة فـ ادين الصغير والكبير
بدر البدور .
ولا حد زقِّك واللا سبِّك ...
واللا مد اديه بيتْحَرَّش بفَجْرك
كان نفسى أزعق واملا كل الدنيا إنى يا مصر إبنك .
لما شفت الضَّهْر مَحْنى ...
إنما الحلم العفى بيجمد القلب الضعيفْ
ويمد إيده يحلب الصوت م اللسان
مطرح ما يسرى يمرى وبطول الرصيف ...
مفرود جناح الحب بيجمَّع ف أهلك ...
كان نفسى أزعق واملا كل الدنيا إنى يا مصر إبنك .
لما شفت الصبح فتَّح فى اللى باقى من دموع الليل فى وردك ...
وان ودنك رافضة للطين والعجين ...
وان قولك من دماغك ... لأ . وعارفة ليه ومين ...
واما جيتك كنت عارف تستحقى الصبر كله ... مش يا دوب حبة سنين ..
فاحضنينى بوسع أرضك ...
جدِّدى الأفراح بقربك ...
وبعبيرك ...
شبعينى بطهر نيلك ...
آه بحبك ... بس لىَّ حق عندك ...
حسسينى بعد طول الصبر يا امه
إنى إبنك .
ليست هناك تعليقات:
إرسال تعليق